السلام عليكم ورحمة الله و بركاته
اشلونكم يا عايلي الحلوين ها فرشتوا أسنانكم اليوم...
يقولكم إلي يفرش أسنانه كل يوم ما تطيح و لو إنا هالشيء ما نفع معاي يمكن ينفع معاكم.
يقولكم إلي يفرش أسنانه كل يوم ما تطيح و لو إنا هالشيء ما نفع معاي يمكن ينفع معاكم.
كلمة (شنو ) أكيد الكل يبي يعرف تفسيرها و شلون اطلعت
حرف الشين (شـ) المستخدم قبل الكلمة غالبا ما يستخدم في اللهجة الكويتة
إما بالنفي أو بعدم المعرفة.
نو الموجودة في كلمة شنو هي كلمة إنجليزية و تنكتب جذي :(know)
حفيدتي منيرة اكتبتها الله يخليها لي ما شاء الله إتعرف أكثر من لغة اترعف عربي و إنجيليزي
و فرنسي و همن كويتي خو اللهجة الكويتية بروحها لغة من كثر الكلمات الغريبة إلي فيها
و كلمة نو المذكرة سابقا بالإنجليزية تفسيرها بالعربي إعرف أي معرفة
و بذلك لما نحط حرف (شـ) في البداية تصبح الكلمة بعدم المعرفة .
و ننتهي بالحصول على كلمة شنو .
و هاذي بعض الكلمات الكويتة التي تسبقها حرف (شـ)
1.شكو.
2.شصاير.
3.شفي.
4.شلون.
بس عشان تفهمون معاي ليش استعملنا حرف الشين في البداية.
...ألحين ندخل بالسوالف...
أمس كنت طالعة و رايحة حديقة الأحمدي أشوف هالورد و هالشجر الاصطناعي
قاصين علينا فيهم و انا امصدقة حسبالي شجر طبيعي بقيت اقوم و أتسلقهم.
و أنا قاعدة أشوف حفيداتي و أهما يلعبون تذكرت أيام الطفولة أيام
الحيلة و النط بالحبل و لا جان إيروني إلا ألعب معاهم و لا أكسر
بخاطرهم جان أقوم و ألعب بالديرفة و قاعدين يدزون بعدين هدّوني ألعبها بروحي
جان ياخذني الحماس و ازيد السرعة و لا ما أوعى إلا و أنا طحت على ويهي و طلعت ضروسي من مكانها
(ضروس تركيب لا تخافون) و لا ما أسمع إلا إصراخ حفيداتي
أقولهم (ثفيكم) بالثاء لأن ضروسي طاحت يقولون يدتي ضروسج طاحت .
كان موقف لا أحسد عليه و عليّه لو تشوفون ويوه اليهال إلي كان يلعبون
ههههههه . (صدمة حياتهم كانت).
المرة اليايه ألصقهم عدل و أربط نفسي بالديرفة عشان ما أخرع أحد .
