السلام عليكم ورحمة الله و بركاته
أعتقد مالا داعي أعرفكم عن نفسي كل إلي تبون اتعرفونه عني ها موجود يمينكم
عسى الله يجعلكم من أصحاب اليمين قولوا آمين...
طبعا أنا خو من حريم أول و مالي بالتكنولوجيا شيء لكن ياحلوها حفيدتي منيرة
اسم أثري و عتيج مو بس يحلوه و يا حلوا عتيجنا قالتلي كما في الحوار التالي:
منيرة: يدتي ليش ماتدخلين عالم التدوين بالإنترنت؟
عييز: هاو أسوي رنت ! مو حسبالي تقصد إنت عملي رنت و رنت الكل يعرفها يعني تأجير.
منيرة: هاهاها لا يدتي و الله و اتعرفين إنجليزي بعد.
عييز: وي ههه أعجبج توني خالصة محو الأمية و عارفتلي هل جم كلمة اتفلسف فيهم عليكم .
منيرة : وي اسم الله حولج بس بس خلاص بعدين ترطنين بالأنقلس وين بعدها أقايشج.
عييز: ههه وي بعدها ان شاء الله اتعلم مكسيكي و أشوف هالمسلسلات إلي ذابحينا فيها
1000 حلقة لو تصير عندنا باجر نشوف كل حريم الكويت امسدحين بالمستشفى عاد مسلسلاتنا كلها غثا بغثا
و قسم الجلطات بزيد اللهم يا كافي و لو حبينا انخفف حطينا مسلسلات كوميدية اتلوع الجبد الواحد يبي يضحك
يصكه راسه تعودنا على البجي اذبحتنا حياة الفهد و سعاد عبدالله, الله يهديهم لو يرجعون مثل أول
و يسون من هالمسلسلات الحلوة رقية و سبيجة و خالتي قماشة و غيره أبرك.
منيرة : إي و انتي الصاجة يا يدتي أنا لاعت جبدي و قمت حولت أنجليزي.
عييز : يعني عذر قولي بشوف أنجليزي و خلصي.
منيرة : احم احم ليش هالاحراج يدتي إلا ما زلنا في موضوعنا ها تبين أفتحلج مدونة و تكتبين كل إلي بخاطرج فيه.
عييز: و الله خوش فكرة بس ويني و وين هالكمبيوتر كل ما أيي أشوفج امبحلقه فيه
و أنا أقول اسم الله عليها شالتركيز بحياتي ماحطيت عيني على شيء و ركزت علي هالدرجة و لما أيي
يمج و لا أشوفج تكتبين و تطالعين هالخرابيط إلي مالها أول و لا لها تالي و بعدها عرفت هالتركيز من وين ياي
و لا عيل من متى و التأمل حايشج.
منيرة : يدتي الأنترنت بحر من المعلومات و كل شيء أب ديت يعني تييج الخبرية حار بحار.
عييز: أب ديت و شنو هذا بعد كاكاو يديد
منيرة : لا يدتي يعني مثل اممم إي مثل رفرش.
عييز: أنا خن أعرف الأولى عشان أعرف الثانية.
منيرة : يعني المعلومات على طول أول بأول يدية ما كو أخبار بايته.
عييز: جان قايله جذي من أول خو قلنا انعرف إنقلش بس مو لي هالدرجة .
و بعد هذا الحديث وافقت على إني أفتح مدونة و الله يسلمها و يخليها لي منورة زينة البنات
سوت هالمدونة إلي تشوفونها اليوم عسى بس تعجبكم :)
يالله ألحين راح أحط لكم بعض الكلمات و معناها.
بسم الله بدينا.
1-
كلمة( إمصخرة) هي كلمة كويتية قديمة و تعني إنسان مخه حجر يعني بالمختصر
ما يفهم ما يعبي أو على كثر ما تشرح من اليوم لي باجر خلاص المخ إمقفل ما يمع ما يركز أبد خلاص ما يفهم.
2-
كلمة (بربرة) أصل الكلمة قصة كان في واحد مع صديق له متواعدين بمكان و تأخر رفيجة عليه فترة طويلة
فلما وصل لقى رفيجة زعلان و امعصب و امطنقر فبدى يبرر له سبب التأخير فبعدين سامحه شكل المبرر قوي
و بعدين راحوا حق الديوانية فلما وصلوا قالوا شفيكم بطيتوا قاله بس هالمخدي نطرني و من اليوم بس قاعد و يبربر
قال أحد القاعدين بالديوانية يبربر يمكن قصدك يبرر جان يقول الريال إي هذا قصدي و ليش أنا قلت شي غلط قال إي
قلب يبربر ومن يومها و كلمة يبربر تستخدم لمن يطيل في الحديث و ما منه فود لأن رفيجة قاعد يبرر و طول في الحجي و يمكن بهالسبب الريال خلاص راسه قام يعوره جان يسامحه بس يبي يفتك من حنته.
بس جني طولت وايد اليوم أكتفي بهالكلمتين و اليايات أكثر إن شاء الله
و مع السلامة و في حفظ الله و دربكم خضر... D:
